يوم القيامة امر رهيب | اعرف ماذا سيحدث يوم القيامة ؟

شاركه على +Googleأضفه الى Deliciousشاركه على Twitterشاركه على Facebookأضفه الى StumbleUponأضفه الى Digg

َيوم القيامة هتنشق الارض من فوقك .. و هتروح أنت قايم .. وانت سامع صوت شديد بينادي .. فـ تقوم من مكانك .. تدعك عينيك مليانة تراب .. وشكلك معفر جداً .. والكفن واقع على كتفك .. والكل حواليك كدة .. كله بنفس المنظر .. وكلكم تمشوا ناحية الصوت ..
وكله بيهمس (في ايه؟! .. أحنا رايحين فين؟!) محدش بيعلي صوته كله خايف يتجاب ..

وأنت في الطريق لهناك .. هتشوف أمك حبيبتك واحن قلب عليك .. هتتجاهلك! .. وأبوك حبيبك وسندك ولا كأنه شايفك .. وأختك وأخوك .. ولا أهتموا بيك .. ومراتك وولادك .. محدش معبرك ..
وانت! .. مش معبرهم بردو .. ولا طايق تشوفهم أصلاً قدامك اللحظة دي .. ولا هما فارقين معاك ..
والكل ماشي .. رايح ناحية الصوت ده ..
أيه ده؟! مليااارات البشر .. من يوم ما أتخلق أدم حتى يوم القيامة! ..
جن وإنس .. وايه ده كمان؟! .. حيوانات ووحوش .. هو المكان ناقص حيوانات كمان؟! .. لأ وايه ده! .. السماء مال لونها .. بيتغير كدة ليه بتغلي زي النحاس؟! نزل منها أجسام عملاقة ضخمة شكلها غريبة .. هتلاقي الناس تسأل : أفيكم ربكم؟! بس دول الملايكة بس ..
زحمة .. حر رهيب .. الناس بتزق بعض بشكل بشع .. زي الموج كدة .. وايه الحر ده مش طبيعي .. تلاقي الشمس فوقك .. وحواليك ناس غرقانة في عرقها .. اللى عرقه لحد كعب رجليه .. واللى لحد ودنه بيطلع بقه بالعافية عشان ميدخلش العرق ..
وتلاقي ناس عمالة تدور ع ظل .. هيلاقوا ضل هناك أهو .. ظل الرحمن .. بس مش لأي حد كام واحد كدة .. ومفيش شرب ولا أكل ..سنين واقفين ..
الناس تسمعهم يقولوا يارب يبدأ الحساب ونروح النار بس نخلص من الوقفة دي ..
الانبياء تيجي .. يجروا عليهم .. أشفعولنا .. خلي
ربنا يبدأ الحساب .. يقولوهم ربنا غضب اليوم غضبه لم يغضب قبلها .. حتى الانبياء نفسي نفسي .. النبي يجي .. يجروا عليه .. يقولولوا يطلب من الجبار يبدأ الحساب ..
يروح حبيبك النبي .. ويسجد تحت العرش .. ويثنى ع الله .. ويطلب منه يبدأ الحساب
فـ ربنا يستجيب منه .. ويبدأ حساب يوم القيامة ..
الضلمة تتحول نور لأن الارض هتشرق بنور ربها ..
والكتب بتاعة الناس كلها تيجي .. كلها .. صوت وصورة .. هيبتدي الحساب بالانبياء والشهداء ..
ده حتى لما ربنا يسأل الانبياء (ماذا أُجبتم؟) يعني الناس أستجابوا لدعوتكم ازاي؟ من هول الموقف هيسنوا .. هينسوا ايه اللى حصل ..
هيقولوا (سبحانك لا علم لنا الا ما علمتنا انك أنت علام الغيوب) .. ودول أنبياء! أومال أنت هتعمل ايه؟!
فجأة .. الصحف تتطاير .. رعب .. تعب اعصاب .. حرب نفسية ..
تلاقي واحد بيصرخ من الفرحة .. كتابه جاله في اليمين .. وواحد بيصرخ من الحسرة .. كتابه جيه في الشمال .. تلاحظ واحد بيعمل حركة غريبة .. قام حاطط ايده ورا ضهره .. و فجأة الكتاب يجيله من ورا ضهره بردو .. لا مفر يعني ..
تبص ع الناس ساعة الحساب .. تلاقي واحد بيشاور من بعيد .. فرحان داخل الجنة سلام ياجماعة انا داخل الجنة .. والملايكة بتزفه .. تفرح اوي و تقول في أمل .. وواحد وراه شايفه بيتجر ع الارض .. هيتحدف في النار .. أعصابك تسيب ..
وفجأة .. أنت .. أسمك .. تسمعه بيتنادي عليه!
انا؟! أسمي؟!!
تلاقي الملايكة جاية تاخدك للوقوف أمام الله ..
تخيل الصمت اللى في المكان .. كله بيتفرج .. كله ساكت .. وانت رجلك مش شايلاك .. عمال تفكر .. أو مش قادر تفكر؟ .. ممكن وأنت رايح تلاقي أمك وأبوك وأخواتك وأصحابك .. يبيصوا عليك .. يا ع الموقف .. هيشوفوني .. هيعرفوا فضايحي و ع الملأ ..
وتبص الناحية التانية .. تلاقي ملايكة وأنبياء وشاهدين .. يا ع فضحتي .. ممكن تكون صالح فـ يسترك فـ محدش يعرف حاجة .. وممكن تكون تستحق الفضيحة .. فـ يكون حسابك ع الملأ .. صوت وصورة ..
ويبدأ حساب يوم القيامة ..
وربنا يسألك فيما معناه .. يا عبدي (الكلمة لوحدها تخليك عايز تبكي يمكن تكون الأول تفتكر انك المفروض عبده هو مش عبد للدنيا ولا للحب ولا المال ولا الاولاد ولا الشهرة)
ألم أنزل اليك كتابا؟ .. ألم أرسل اليك رسولا؟ ..
ويقولك الاية اللى نهاك فيها عن الحاجة دي .. عن السرقة / الغيبة / عدم خلع الحجاب / التبرج .. إلخ
ويقولك ليه؟ ..
رزقتك بالصحة والمال؟! .. رزقتك بالنعم الفلانية؟!
ليه؟! .. لماااذا لم تستحي مني؟! .. ما الذي غرك بي؟! .. اجابتك بقى هتكون ايه يا ترى؟! .. سكوت؟! هتبص فـ الارض .. هتبكي اوي؟! معرفش ..
عملت ايه في صحتك وشبابك ومالك؟! عملت ايه؟
كنت بتصلي الفروض الـ 5؟! بس كدة؟! .. نفعت دينك بايه؟ .. سبت في الدنيا بصمة ايه؟ .. في السر كان حالك ايه؟
جعلته أهون الناظرين اليك ليه؟ .. كنت بتستحي من الناس ولا تستحي من الله؟!! .. ليه قلت الكلام ده؟! مش حرمه عليك؟!
ليه .. وليه ؟!
كلمة ( لماذا ) من الله .. أصعب كلمة ممكن هتسمعها في حياتك كلها .. هتتمنى حرفيا تنشق الارض وتبلعك ..
وممكن بردو اليوم ده .. تكون من ضمن الناس اللى بتدي أمل للناس اللى واقفة ببشرى الجنة لأنك هتدخلها باذن الله
الموقف صعب يوم القيامة.. و هتقف لوحدك قدامه .. أعمل لليوم ده ..
وأدعي كتـير : اللهم أمني يوم الفزع الأكبر :)